علــــــى الهون ياجرح المفارق وضيق البال
علي الهون ياهم سطابي وقدرته !
اعزك لوانك جرح ومجاهدك قتال
وروضت جسمي لاجل سقمك صبرته!
لاجل من ملك( قلبـــــــــي) من الجال لين الجال
وفجيت له باب عن الناس سكرته !
وحطيت له عن شمس قيظ الغرام اظلال
وشيدت له بيت بقلبي وعمرته !
عشقته ودللته وجريت له موال
وتخيرت قربه ليتني ما تخيرته !
رعي ريف قلبي لين صار الحشا مدهال
وعن مدهله جنبت غيره وذيرته !
سقيته من عدود الغلا والغرام زلال
بعد ماجذب من دم قلبي وصدرته !
اداري عليه من الزعل وازعل العذال
وخطاه ان كبر في عين غيري تصاغرته!
ترافقت انا وياه من يوم كنا اصغار
تكون غلاه بوسط قلبي وكبرته !
قبل مايغطي ليله المنتثر بالشال
سرقت الكرى من نون عينيه وسهرته!
نقش كل حرف من حروفي على السلسال
تباهى بها واغاظ ناس مجاكرته !
وكتبت القصايد في عيونه علي اليامال
وليا مرني صوت النواخذ تذكرته
تكاثر علي الله يجازيه كيف الحال
وانا يوم اسوق العمر له ما تكاثرته !
وبعد كل هالتقدير والحب والاجلال
تغير وهقواته عليه مغيرته!
لبسته ثياب الغطرسه لين جا يختال
وكبر في عيونه يوم الاوهام غررته !
واذاالسالفه ضحك ومهازل ولعب اطفال
خبطت الغصن لين ابرق الريش طيرته !
خلصنا وقفلنا الصناديق با لاقفال
ومن جور حكمه كامل القلب حررته !