لا تسأل اللي قضى عمره على صبره !=انا طوتني هموم الوقت من صغري
كرهت وضعي ولكن ماقدرت اكره=آمالي اللي تجسّد في جفن سهري
اشوف حالي تغير واختلف فأمره=الحال مزري وهم اللي رحل مزري
العيد مابه فرح لاصار به عبره=والدمع مايصدق إلا لا ذرف شعري
والحزن له داخلي سكره ورى سكره=احاول افيق منها و ارتشف قهري
ياما زرعت الرجا بقطف منه ثمره=والشوك ناتج محاصيلي على فقري
اصل البحر لو تزيده دمعتي قطره=فاض البحر ورتفع مده على جزري
لو الاماني تجي في وقتها بكره=ما كنت ابتبع سراب ٍ فالعرى يجري
ياصاحبي لاتزيد المنتظر حسره=تراه ماباع من قدره ولا يشري
احتجت لك في قساوة وقتي وعسره=وين انت في وقتها ؟ كنك ولا تدري
ياما زعلتك رضا ماينقبل عذره=ياما بكيتك فرح ماجاد به فكري
ذكراك جمره وانا قلبي على الجمره=لو ماطريتك حرارة جمرتك تطري
مابيك ترحم خيالي وابيك لا تشره=لو شفتني ضاقت انفاسي على صدري
دنياك هذي تهد الحلم وتعمره=لكنها هدت احلامي على عمري