بغداد _ ناصر القحطاني

عساها فاتحة برد وسلام وخاتمة و قــَّـــاد = على دار السلام الله يروّع من يروّعها
حضارة سومر وبابل قبل تشريفة المـــيلاد = عروق الرسل والعلم واهل الشعر وروايعها
هوى سيف الله المسلول يوم السيوف حـداد = مساري سربة ٍ كان المثتى في طلايعها
عروس ٍ زفها المنصور والدنيا لها ســـجاد = ودلعها الرشيد الله عليها يوم دلعـــها
بدت بالسندس اللي يهوس الخلان والحســاد = وكثر ماهزها التاريخ ما اهتزت مرابعـها
بقت خضر ٍ مرابعها بقت تنجب لنا الأمجــاد = بقت بيض ٍ صنايعها بقت سود ٍ وقايعـها
ورى ما تستميت اقلوبنا معها وهي بغـــداد = ياكبر العار لو ما تستميت قلوبنا معـــها
عليها الله وامان الله الى ذرات زين ابــــلاد = هجد صوت القنابل جنب تهليلة جوامعـها
دهاها من ورى الحملات ليل ٍ لو نقص يـزداد = أهلنا في مدامعها واهلها في مطامعـــها
هل الحرية اللي لا غشى اصحاب البيوت ارقاد = تفرق بينها من دوية الهاون مضاجعــها
هل الحرية اللي بعدها صاروا بنات الضــاد = ينشوش المعتدي حشمة ملابسهن ويرفعها
هل الحرية اللي قصت أجنحة أكـــثر الأولاد = مادام ايدينها ماترفع اثنين ٍ مصابعــها
تعودنا على حرق النسل والحرث والأصفــاد = تعودنا على نار ٍ يطفيها مولعـــــها
يبس بكفوفها إلا غصن زيتون ٍ وكما المعتاد = عناقيد الهدايا جاتنا من كف صانعـــها
عسى المقبل مثل صيحة ثمود ومثل صرصر عاد = عشان أهل البيوت الخاربه تبرى مواجعها
ألا وين المراكب سايره في حضرة الـــرواد ؟ = عساهم للدواير لين تدرجهم منافعـــها
مصير امصار و اجيال وزمن وجموع بيد افراد = لها التاريخ بالمرصاد وان خانت ودايعها
محبتنا عداوه والقلوب قريبـّات بعـــــاد = بعد ما نصنع الكذبه نصدقها ونتبعـــها
خذتنا العنتريات الله يبيح من ابن شـــداد = وضعنا بالخطب ليت الخطب نقدر نضيعها
تواعدنا مع الوحدة وصرنا نخلف الميعـــاد = مذاهب وانظمه واحزاب من يقدر يجمِّعها
تصهْيَنْ دم ناس ٍ طايرين بعجة الأوغــــاد = تصاغرنا مثل ماستصغر الكرسي مراجعها
أخيرا : كم بقى طاغي وكم باغي وكم جلاد ؟ = وكم لص وكم أصنام وكم أوهام ٍ نصارعها ؟
وكم صورة تظن الروح والدم أغنيه وانشاد ؟ = وهي كل ٍ هناك يدوسها والا يقطّـعها
لعل الليله اللي جابت الكابوس ماتنعــــاد = وبسم الله على بغداد من شي ٍّ يروّعها

لعل الليله اللي جابت الكابوس ماتنعــــاد = وبسم الله على بغداد من شي ٍّ يروّعها